Pappa's Diwali Recipes Collection

🌾🌾🌾🌾🌾🌾🌾🌾🌾🌾

चकली(२ किलो)

साहित्य:
१ किलो तांदूळ
१/४ किलो चणाडाळ
१०० ग्राम मुगडाळ
१०० ग्राम उडीद डाळ
५० ग्राम पोहे
५० ग्राम शाबुदाणे
५० ग्राम जीरा
५० ग्राम काळीमिरी
१० ग्राम लाल मिरची पावडर
५० ग्राम पांढरे तीळ
१ छोटी वाटी गोडेतेल
मीठ चवीनुसार
तळण्यासाठी तेल (साधारण १ ते दीड किलो)
पाणी
वेळ: २-३ तास

कृती:
प्रथम तांदूळ, चणाडाळ, मुगडाळ, उडीदडाळ, पोहे, शाबुदाणे, जीरा, काळीमिरी १०-१५ मिनिटे कढईमध्ये भाजून घेऊन दळून आणणे.
दळून आणलेले पीठ पातेल्यात मोजून घेणे.
पिठाच्या निम्मे पाणी उकळत ठेवणे.
पाण्याला उकळी आल्यानंतर त्यात १ छोटी वाटी तेल टाकणे व पांढरे तीळ टाकणे.
चवीनुसार प्रमाणामध्ये मीठ व मिरची पावडर पाण्यात टाकून पाणी खाली उतरावे.
दळून आणलेले पीठ पाण्यात घालून मिश्रण हलवून घ्यावे व नंतर १० मिनिटे पिठावर झाकण ठेवावे.
नंतर ते मळून चकलीच्या साच्याने चकल्या पाडाव्यात.
१ किलो तेल तळण्यासाठी तापत ठेवावे.
साच्याने पाडलेल्या चकल्या तेलात तळून घेणे.
तयारझालेल्या चकल्या सर्व्ह करा.
नोंद:
चकल्या तळताना मंद आचेवर तळाव्या म्हणजे कुरकुरीत होतात. तळताना आच कमी-जास्त करावी. तळताना तेल थंड झाले तर चकली विरघळून तुटेल व तेलही जास्त ओढून घेईल.
मुंग्यांचा उपद्रव टाळण्यासाठी साठवणीच्या ठीकाणी कडूंनिंब किंवा कापूर ठेवावे.

🌾🌾🌾🌾🌾🌾🌾🌾🌾🌾
🌾🌾🌾🌾🌾🌾🌾🌾🌾🌾
मक्याचा चिवडा(१/२ किलो)

साहित्य:
१/२ किलो मक्याचे पोहे (Corn Flakes)
१०० ग्राम शेंगदाणे
१ वाटी सुक्या खोबरयाच्या चकत्या
२ मोठा चमचा पिठी साखर
मीठ
हळद
१/२ किलो तेल
कडीपत्ता
७-८ मिरच्या
२ चमचे चिवडा मसाला
वेळ: १ तास

कृती:
प्रथम कढईत तेल गरम करुन पोहे तळून घ्यावे.
तळलेले पोहे एका भांड्यात काढून घेणे.
शेंगदाणे तळून घेणे.
पातळ खोबरयाच्या चकत्या तांबूस रंग येईपर्यंत तळून घेणे.
वरील सर्व तळलेले साहित्य पोह्यांमध्ये एकजीव करणे.
वरुन थोडी हळद आणि मीठ घालून मिश्रण एकजीव करुन घेणे.
एका मोठ्या टोपात थोडेसे तेल घालून मिरच्या आणि कडीपत्ता यांची फोडणी तयार करणे. त्यात २ चमचे चिवडा मसाला टाकणे.
वरील मिश्रण फोडणीमध्ये टाकूनआचेवरुन उतरवणे.
तयार मिश्रणात २ चमचे पिठी साखर टाकून मिश्रण हलवून घ्यावे.
नोंद:
शेंगदाण्या प्रमाणेच चण्याचे डाळं तळून चिवड्यात वापरु शकतो.
जर मिरच्या वापरायच्या नसतील तर फक्त लाल तिखट वापरु शकतो.
चवीसाठी काजूही वापरु शकतो.
मुंग्यांचा उपद्रव टाळण्यासाठी साठवणीच्या ठीकाणी कडूनिंब किंवा कापूर ठेवावे.

🌾🌾🌾🌾🌾🌾🌾🌾🌾🌾

🌾🌾🌾🌾🌾🌾🌾🌾🌾🌾


बेसनचे लाडू(१ किलो)

साहित्य:
१/२ किलो चणा डाळीचे जाडसर पीठ
१ वाटी वनस्पती तूप
दीड वाटी साखर
५-६ वेलच्या
थोडं जायफळ
२ चमचे चारोळी
१५-२० बेदाणे
वेळ: १ ते २ तास

कृती:
सर्व प्रथम कढईत तूप तापवा.
तूप तापल्यावर डाळीचे पीठ घालून सतत परतत राहा. परतताना चमच्याने पीठ दाबून पिठाच्या गुठया मोडत राहाव्यात.
मंद आचेवर २०-२५ मिनिटे बेसन परतावे. बेसन भाजत आले कि बेसन मधून तूप सुटू लागते.
परतताना तूप चमकू लागले व बेसन लाल रंगाचे होऊन खमंग वास सुटला कि बेसन ताटात ओतावे.
बेसन थंड झाल्यावर साखर मिक्सरमध्ये दळून मिसळावी.
तसेच वेलची-जायफळ पाउडर, चारोळी घालून बेसन हाताने मळावे व एकेक लाडूला एक बेदाणा लावून लाडू वळावेत.
तयार लाडू खाण्यासाठी सर्व्ह करा.
नोंद:
कोणत्याही लाडवाचा भाजा भाजताना वनस्पती तुपा ऐवजी साजूक तूप घेतल्यास कमी लागते व लाडू खमंग होऊन मऊ राहतात.
मुंग्यांचा उपद्रव टाळण्यासाठी साठवणीच्या ठिकाणी कडूनिंब किंवा कापूर ठेवावे.

🌾🌾🌾🌾🌾🌾🌾🌾🌾🌾
🌾🌾🌾🌾🌾🌾🌾🌾🌾🌾


खारे शंकरपाळे(१ किलो)

साहित्य:
१/२ किलो मैदा
१०० ग्राम तूप (किंवा डालडा)
४ चमचे जीरे
मीठ चवीनुसार
तळण्यासाठी तेल
पाणी
चीरणी
वेळ: १ ते १.३० तास

कृती:
सुवातीला तूप गरम करुन घेणे.
मैद्यामध्ये तयार गरम तूप, मीठ आणि जिरे घालून संपूर्ण मिश्रण हाताने मळून घ्यावे.
नंतर त्यात प्रमाणामध्ये पाणी घालून तयार पीठ व्यवस्थित मळून घेणे.
पिठाला पोळीसारखे लाटून चीरणीने शंकरपाळ्याचा आकार द्यावा.
शेवटी त्या गरम तेलात तळून घ्याव्यात.
तयार झालेल्या शंकरपाळ्या सर्व्ह करा.
नोंद:
शंकरपाळ्या तळताना आच कमी-जास्त करावी. तेल जास्त थंड झाल्यास पदार्थ तेलकट होतात.
मुंग्यांचा उपद्रव टाळण्यासाठी साठवणीच्या ठिकाणी कडूनिंब किंवा कापूर ठेवावे.

🌾🌾🌾🌾🌾🌾🌾🌾🌾🌾

🌾🌾🌾🌾🌾🌾🌾🌾🌾🌾

गोड शंकरपाळे(१ किलो)

साहित्य:
१/२ किलो मैदा
१ वाटी तूप
१/४ किलो पिठीसाखर
४ वेलच्यांची पूड
मीठ चवीनुसार
तळण्यासाठी तेल
१ वाटी दुध
पाणी
चीरणी
वेळ: १ ते १.३० तास

कृती:
सुवातीला तूप गरम करुन घेणे.
2. मैद्यामध्ये तयार गरम तूप, पिठीसाखर, मीठ आणि वेलची पूड घालून संपूर्ण मिश्रण हाताने मळून घ्यावे.
3. नंतर त्यात प्रमाणामध्ये पाणी व दुध घालून तयार पीठ व्यवस्थित मळून घेणे.
4. मळलेले पीठ १-२ तास तसेच झाकून ठेवणे.
5. पिठाला पोळीसारखे लाटून चीरणीने शंकरपाळ्याचा आकार द्यावा.
6. शेवटी त्या गरम तेलात तळून घ्याव्यात.
7. तयार झालेल्या शंकरपाळ्या सर्व्ह करा.
नोंद:
शंकरपाळ्या तळताना आच कमी-जास्त करावी. तेल जास्त थंड झाल्यास पदार्थ तेलकट होतात.
मुंग्यांचा उपद्रव टाळण्यासाठी साठवणीच्या ठिकाणी कडूनिंब किंवा कापूर ठेवावे.


🌾🌾🌾🌾🌾🌾🌾🌾🌾🌾
🌾🌾🌾🌾🌾🌾🌾🌾🌾🌾


पोह्यांचा चिवडा(१ किलो)

साहित्य:
१ किलो पातळ पोहे
१/४ किलो शेंगदाणे
१०० ग्राम चण्याच्या डाळीम्बी
२ वाटी सुक्या खोबरयाच्या पातळ चकत्या
१ वाटी सोललेल्या लसूण पाकळ्या
२५ ग्राम राई
२ चमचे हळद
१/२ वाटी साखर
१०० ग्राम हिरव्या मिरच्या (बारीक कापलेल्या)
कडीपत्ता फोडणीसाठी
२०० ग्राम तेल
चवीनुसार मीठ
वेळ: १ ते १.३० तास

कृती:
सर्वप्रथम पोहे मंद आचेवर कुरकुरीत भाजून घेणे.
नंतर भाजलेले पोहे चाळून घेणे.
शेंगदाणे, खोबरयाच्या चकत्या व डाळीम्बी तेलात तळून घेणे.
तळलेले शेंगदाणे, खोबरयाच्या चकत्या व डाळीम्बी भाजलेल्या पोह्यांमध्ये एकजीव करुन घेणे.
कढईत तेल टाकून लसुण लालसर होईपर्यंत तळणे.
तळलेल्या लसणीमध्ये मिरच्या, राई, कडीपत्ता आणि हळद घालून फोडणी तयार करा.
ही फोडणी गार झाल्यावर त्यात हळद घालून वरील पोह्यांच्या मिश्रणात टाकून एकजीव करुन घेणे.
नंतर त्यात साखर आणि मीठ टाकून मिश्रण चांगले एकजीव करा.
तयार मिश्रण १० ते १५ मिनिटे झाकून ठेवा.
तयार चिवडा सर्व्ह करा.
नोंद:
पोह्यांचा चिवडा करताना तेल चांगले तापल्यावर गाळणीत थोडे थोडे पोहे घालून तळावेत म्हणजे चटकन फुलतात व तेलकटही होत नाहीत. कमी आचेवर पोहे तळू नका.

🌾🌾🌾🌾🌾🌾🌾🌾🌾🌾

🌾🌾🌾🌾🌾🌾🌾🌾🌾🌾

रव्याचे लाडू(१ किलो)

साहित्य:
१/२ किलो बारीक रवा
१/२ किलो तूप
१/४ किलो
पिठीसाखर
१ चमचा
वेलची व जायफळ पूड
१/४ किलो सुखा किसलेला खोबरं
शोभेसाठी मनुका किंवा काजू
मीठ चवीनुसार
पाणी
वेळ: २ तास

कृती:
प्रथम खोबरं लालसर भाजून घ्या.
१०० ग्राम तुपात रवा लालसर भाजून घेणे.
भाजलेला रवा थंड झाल्यावर त्यात पिठीसाखर, जायफळ, वेलचीपूड, भाजलेलं खोबरं , मनुका आणि काजू घालून मिश्रण एकत्रित करावे.
उरलेले तूप गरम करुन त्या मिश्रणात ओतावे आणि मिश्रण एक करावे.
मिश्रण थोडे थंड झाल्यास लाडू वळण्यास घ्यावे.
तयार झालेल्या रव्याचे लाडू सर्व्ह करा.
नोंद:
कोणत्याही लाडवाचा भाजा भाजताना वनस्पती तुपा ऐवजी साजूक तूप घेतल्यास कमी लागते व लाडू खमंग होऊन मऊ राहतात.
मुंग्यांचा उपद्रव टाळण्यासाठी साठवणीच्या ठिकाणी कडूनिंब किंवा कापूर ठेवावे.

🌾🌾🌾🌾🌾🌾🌾🌾🌾🌾
🌾🌾🌾🌾🌾🌾🌾🌾🌾🌾

करंज्या(१ किलो)

साहित्य:
१ किलो मैदा
१/२ किलो पातळ वनस्पती तूप
१ किलो रवा
१/२ किलो सुके खोबरे किसून
५० ग्राम खसखस
३/४ किलो पिठीसाखर
५० ग्राम वेलच्या
१ जायफळ पूड
चवीनुसार मीठ (१ चिमुट)
५० ग्राम चारोळ्या
५० ग्राम काजू
५० ग्राम बेदाणे
५० ग्राम सफेद तीळ
वेळ: ३ ते ४ तास

कृती:
सारण:
आता सारण तयार करण्यासाठी रवा कढईत तूप घालून एक गुलाबी रंग येईपर्यंत भाजावे.
सुके खोबरे किसून कच्चेच मिक्सरमध्ये कोरडेच बारीक करुन घ्यावे.
नंतर खोबरे कोरडेच कढईत मंद आचेवर किंचित गुलाबी रंगावर भाजावे. जास्त गुलाबी भाजू नये.
खोबरे भाजल्यावर ते भाजलेल्या रव्यात मिसळावे.
खसखस गुलाबी भाजून ती रव्यात मिसळावी.
रवा व खोबरे थंड झाल्यावर त्यात वेलची जायफळ पूड, मीठ व पिठीसाखर बारीक करुन मिसळावी.
सफेद तीळ, काजू, चारोळी, बेदाणे सर्व मंद आचेवर तूप घालून गरम करून तयार झालेल्या रव्याच्या सारणामध्ये घालून मिक्स करून घ्यावे. सारण तयार झाले.

पीठ:
पीठ तयार करण्यासाठी प्रथम १ वाटी तूप थोडे गरम करुन सुक्या मैद्यात मिसळावे.
मीठ, पाणी घालून पीठ मळावे व १ तास ठेवावे.

करंज्या:
पीठाचे छोटे गोळे करुन पुरी एवढे गोल व पातळ लाटावेत.
एकेका पुरीवर मधोमध १ चमचा सारण घालून पुरीच्या कडांना पाणी लावून एक कडा दुसरया कडेला घट्ट दाबून चांगले चिकटवावे.
करंजी कापण्याकरता अगदी कडेने चीरणीने कापावे व ओल्या पातळ कपड्याने झाकून ठेवावे म्हणजे सुकणार नाहीत.
१५ -२० करंज्या तयार करुन नंतर कढईत तूप किंवा तेल चांगले तापल्यावर मंद आचेवर तळून घावे.
तयार करंज्या खाण्यासाठी सर्व्ह करा.

नोंद:
करंजीचे पीठ भिजवताना थोडे तूप किंवा तेल गरम करुन घातले म्हणजे करंज्या खुसखुशीत होतात.
करंज्या मंद आचेवर तळाव्यात म्हणजे त्या खुसखुशीत होतील.
करंज्याच्या सारणात घालावयाचे सुखे खोबरे थोडे भाजून घ्यावे म्हणजे खूप दिवस झाले तरी करंज्या खराब होणार नाहीत.
🌾🌾🌾🌾🌾🌾🌾🌾🌾🌾

🌾🌾🌾🌾🌾🌾🌾🌾🌾🌾

शेव

साहित्य:
४ वाट्या डाळीचे पीठ
३ चमचे तिखट
१/४ चमचा हळद
१ चमचा मीठ
१/४ चमचे हिंग
३ चमचे तेलाचे मोहन
१ चिमुट सोडा
१ चमचा जिरे
१/२ चमचा ओवा
१०-१२ लसुन पाकळ्या
वेळ: १ ते २ तास

कृती:
सर्वप्रथम जिरे, ओवा व लसुण मिक्सरमध्ये बारीक वाटावे.
परातीत पीठ घेऊन त्यात हळद, तिखट, मीठ, हिंग, सोडा एक करावे.
तेल कडकडीत तापवून पिठात ओतावे व एकत्रित करावे. नंतर त्यात वाटलेले लसुण, जिरे, ओवा एक करुन कोमट पाण्यात पीठ भिजवावे.
शेवेच्या साच्यात पीठ भरुन कढईत तेल चांगले तापल्यावर मंदआचेवर शेव तळून घ्यावी.
दोन्ही बाजूंनी शेव गुलाबी व कुरकुरीत झाली कि झाऱ्याने शेवेची चकती बाहेर काढून तेल निथळवावे व पेपरवर टाकावी.
याप्रमाणे सर्व शेव करावी आणि नंतर हाताने कुस्करुन डब्यात भरावी.
तयार शेव खाण्यासाठी सर्व्ह करा.
नोंद:
शेव तळताना आच कमी-जास्त करावी. तेल जास्त थंड झाल्यास पदार्थ तेलकट होतात.


🌾🌾🌾🌾🌾🌾🌾🌾🌾🌾
🌾🌾🌾🌾🌾🌾🌾🌾🌾🌾
अनारसे

साहित्य:
१ कप तांदूळ
१ कप किसलेला गूळ
१ चमचा तूप
खसखस
तळण्यासाठी तूप किंवा तेल
वेळ: १ तास

कृती:
४ दिवस सलग तांदूळ पाण्यात भिजवून ठेवावे. रोज पाणी बदलणे.
४ दिवस झाले कि चाळणीत कपडा ठेऊन तांदूळ त्यात टाकावे. यांना व्यवस्थित सुकवावे आणि नंतर मिक्सर मधून काढून घेणे.
गूळ किसून १ चमचा तूप त्या पिठात मळावे. घट्ट गोळा ५-६ दिवस डब्यात ठेवावा.
सहाव्या दिवशी पीठ बाहेर काढणे. पिठाचे बारीक गोळे तयार करुन ते जाड लाटावे वरुन खसखस लावावी आणि तळण्यासाठी तूप किंवा तेल वापरुन त्यात खसखस असलेली बाजू वर ठेऊन तळावे.
अनारसे सोनेरी रंगाचे होईपर्यंत तळावे.
नोंद:
मुंग्यांचा उपद्रव टाळण्यासाठी साठवणीच्या ठीकाणी कडूनिंब किंवा कापूर ठेवावे.

🌾🌾🌾🌾🌾🌾🌾🌾🌾🌾